Уншигчдын бичсэн сэтгэгдэлд hurts.mn хариуцлага хүлээхгүй болно. Манай
сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл
бичихдээ бусдын эрх ашгийг хүндэтгэн үзнэ үү.
Украины сэтгүүлч Викториа Рощина Орост эзлэгдсэн нутаг дэвсгэр дээрээс 2023 онд сураггүй болж байв. Тухайн үед 27 настай байсан Рощина оросуудад баривчлагдсан байсныг сүүлд тогтоожээ. Тэгвэл оросууд түүнийг баривчлаад зогсохгүй эрүүдэн шүүж, эд эрхтнийг нь авсан болохыг Мягмар гаригт /2025.04.29/ хэвлэлүүд мэдээлэв.
ОХУ өнгөрсөн хоёрдугаар сард сэтгүүлчийн цогцсыг Украинд илгээсэн байна. Тухайн үед сэтгүүлчийн бие цогцост тамлуулсан, эд эрхтнийг нь авсан ул мөр байсныг Украины прокурорууд шүүх эмнэлгийн шинжилгээнд үндэслэн мэдээлжээ. Украины Ерөнхий прокурорын дэргэдэх Дайны гэмт хэрэгтэй тэмцэх хэлтсийн дарга Юрий Белоусовын хэлснээр сэтгүүлч эмэгтэйн хавирга хугарсан, хүзүү гэмтсэн байснаас гадна тогонд цохиулсан байж болзошгүй ул мөр байжээ.
ДНХ-ийн үзүүлэлтүүд өндөр магадлалтай таарч байгаа ч эмэгтэйн эцэг одоо хүртэл тухайн цогцсыг охиноо гэдэгт итгэхгүй байна. Иймд нэмэлт шинжилгээ хийлгэх хүсэлт тавьжээ.
Эзлэгдсэн бүс нутгуудаас олон мянган энгийн иргэн Орост олзлогдсон билээ. Тэдний олонх нь эрүү шүүлт амссан байдгийг төрийн бус байгууллагууд болон хэвлэлүүд мэдээлсээр байна.
Харин Украины сэтгүүлчид эрсдэлийг харгалзан үзээд эзлэгдсэн бүс нутгууд руу бараг явдаггүй. Рощинагийн хувьд Орост олзлогдож, амиа алдсан анхны украин сэтгүүлч болж байна. Тэрээр "Ukrainska Pravda" хэвлэлд чөлөөт сэтгүүлчээр ажиллаж байв. Мөн АНУ-ын санхүүжилттэй "Radio Free Europe" сэтгүүлийн Украины албатай хамтран ажиллаж байжээ.
2023 онд олзлогдохоосоо өмнө тэрээр 2022 оны гуравдугаар сард 10 хоногийн турш оросуудад баригдаж байв. Мөн ондоо тэрээр зүүн Украины нөхцөл байдлыг сурвалжилсныхаа төлөө Олон улсын эмэгтэйчүүдийн сангаас Сэтгүүл зүйн эр зоригийн шагнал хүртэж байжээ.
ЭХ СУРВАЛЖ: CB
