Уншигчдын бичсэн сэтгэгдэлд hurts.mn хариуцлага хүлээхгүй болно. Манай
сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл
бичихдээ бусдын эрх ашгийг хүндэтгэн үзнэ үү.
Цэнгээний газрын гадна бусдыг бүлэглэн зэрлэгээр зодож, хүнд гэмтэл учруулсан УИХ-ын гишүүн асан Ц.Цэрэнпунцагийн Ц.Санжаачойпэлийг шүүхээс 07.23-ны өдөр 30 хоногоор хорих шүүхийн шийдвэр гарч хоригдож байсан. Гэвч түүнийг 16 хоног хориод суллажээ.
Тодруулбал, Наймдугаар сарын 7-ны өдөр Ц.Санжаачойпэлийн өмгөөлөгч шүүхэд таслан сэргийлэх арга хэмжээг өөрчлөх хүсэлт гаргасан байна. Учир нь Ц.Санжаачойпэл нь тухайн зодооны үед гэмтэл авч, өдгөө толгой эргэх, нүдний гэмтэлтэй байгаа бөгөөд нарийн мэргэжлийн эмчийн эмчилгээ авах шаардлагатай болсон гэж өмгөөлөгч нь мэдэгдсэн байна.
Тиймээс шүүхээс энэхүү хүсэлтийг үндэслэн түүнийг хязгаарлалттай таслан сэргийлэх арга хэмжээнд шилжүүлэх шийдвэр гаргасан бөгөөд Монгол Улсын хилээр гарах, бусад гэмт хэрэгтнүүдтэй уулзахыг хориглох нөхцөл тавьсан байна. Ингэснээр УИХ-ын гишүүн асан Ц.Цэрэнпунцагийн хүү Ц.Санжаачойпэлийг хоригдсоноос хойш 16 хоногийн дараа шүүгчийн захирамжаар сулласан байна.
Иймд Прокурорын байгууллагаас бусдын биед гэмтэл учруулж 30 хоногийн баривчилгаа авсан ч хугацаанаасаа өмнө суллагдсан Ц.Санжаачойпэлийн эсрэг шүүхэд гомдол гаргажээ. Уг гомдлын шүүх хурал удахгүй болох юм байна.
Харин Ц.Санжаачойпэлтэй хамт 30 хоногийн баривчилгаа авсан Э.Тэмүүлэн, Л.Алтан-Очир нар суллагдаагүй, цагдан хоригдсон хэвээр байгаа юм.
