Уншигчдын бичсэн сэтгэгдэлд hurts.mn хариуцлага хүлээхгүй болно. Манай
сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл
бичихдээ бусдын эрх ашгийг хүндэтгэн үзнэ үү.
Монгол Улсын Засгийн газрын 2017 оны 98 дугаар тогтоолоор баталсан Агаар, орчны бохирдлыг бууруулах Үндэсний хөтөлбөрийн хэрэгжих хугацаа 2025 онд дуусгавар болж буй. Үүнтэй холбогдуулан Агаарын бохирдлыг бууруулах Үндэсний хорооны Ажлын албанаас өнөөдөр /2025.08.29/ “Агаар, орчны бохирдлыг бууруулах Үндэсний хөтөлбөрийн хэрэгжилт, цаашид авах арга хэмжээний хэлэлцүүлэг”-ийг Цаг уур, орчны шинжилгээний газрын хурлын танхимд зохион байгууллаа.
Тус арга хэмжээнд уг хөтөлбөрийг хэрэгжүүлэгч байгууллагууд болох 12 яам, 6 агентлаг болон НҮБ, ТИКА зэрэг олон улсын байгууллага, ТББ-уудын төлөөлөл оролцов.
Хэлэлцүүлгийн эхэнд Агаарын бохирдлыг бууруулах Үндэсний хорооны Ажлын албаны ахлах мэргэжилтэн С.Төмөрбат “Агаар, орчны бохирдлыг бууруулах Үндэсний хөтөлбөрийн хэрэгжилтэд хийсэн хяналт-шинжилгээ”-ний үр дүнг, БОУАӨЯ-ны Агаарын бохирдлын асуудал хариуцсан мэргэжилтэн А.Даваадорж шинээр боловсруулах дунд хугацааны төлөвлөгөөний талаар товч танилцуулга хийсэн юм.
Мөн Нийслэлийн Агаар, орчны бохирдолтой тэмцэх газрын дарга Д.Мөнхбаатар агаарын бохирдлыг бууруулах дунд хугацааны төлөвлөгөөг танилцуулж, Гандан, Зурагт орчмын 5000 айлыг дулаалж, хийн халаагуурт шилжүүлэхээр ажиллаж байгааг мэдээлэв.
АНУ-ын стандартаар Монгол Улсын нөхцөлд тохируулан БНХАУ-ын Haier, Hisense компанийн үйлдвэрлэсэн бүрэн автомат хийн зуухыг худалдан авахаар бэлтгэл хангаж байна. Мөн БНХАУ-аас хагас коксон шахмал түлш худалдан авч, борлуулалтын 400 цэгээр иргэдэд нийлүүлэхээр төлөвлөж байгааг танилцуулан, оролцогчдын асуултад хариуллаа.
Хэлэлцүүлгийн үеэр яамд, төрийн байгууллагуудын албан тушаалтнууд агаарын бохирдлыг бууруулах чиглэлээр өөрсдийн хариуцсан ажлын талаар саналаа хэлж, агаарын бохирдлыг бууруулах дунд хугацааны төлөвлөгөө гаргахад Үндэсний хороо манлайлан ажиллахаар болов.
